I Gosos

I Gosos dei Santi venerati a Sedilo: S. Antonio, S. Giacomo, S. Isidoro, S. Giovanni, Maria Ausiliatrice, S. Costantino e S. Basilio.

Gosos de Sant'Antoni Abbate

Penitente prodigiosu
Prodigiu de santitade
Santu pienu de piedade
Antoni Abbate Gloriosu

1 - Naschidu de alta grandesa
Pienu de umilidade
Abbratzestis sa povertatde
Renuntziende a sa ricchesa,
Bos unistis cun prestesa
A su Deus amorosu.

2 - Da' supremu amore feridu
In sa pius florida edade
Chirchestis sa povertade
In su desertu fuidu,
A Deus azis offeridu
Alma et coro rispettosu.

3 - S'evangelice Dottrina
Ch'in su pulpitu intendestis
In opera la ponzestis
Cun prestesa Peregrina,
Dende a sa Oghe Divina
Gratu assensu virtuosu.

4 - Giovanu de pagos annos
Sos benes bostros donestis
A poberos ch'incontrestis
Chi bivian cun affannos,
Movidu da' caridade,
Cun vivu coro piedosu.

5 - In s'ispilunca trintannos
Bivistis cun penitentzia
Supportende cun passentzia
De Satana sos ingannos:
Gesusu in sos affannos
Bos visitat amorosu.

6 - Su sole ch'in primu oriente
Orande bos agattesit
Et orande bos lassesit
Decclinadu in s'occidente,
Senza tenner pro niente
Su corpus bostru reposu.

7 - Sos infernales ministros
De bois invidiosos,
Cun visaggios ispantosos
Inventat pensares tristos,
Mustrende ferocidade
Cun malu impignu orrorosu.

8 - Sustenestis che valente
Pius de chentannos in terra
Una portentosa gherra
Cun s'inimigu potente,
De chie continuamente
Restestis vittoriosu.

9 - Sos ispiritos immundos
De s'ommine appoderados
Dae bois flaggellados
Si che fuint iracundos
In sos inferros profundos
A logu pius tenebrosu.

10 - Postu in caduca edade
Ricca de meritos s'alma
Bos desit triunfale alma
In sa celeste cittade,
Et a tanta santidade
Tronu riccu et gloriosu.

11 - Già chi sa fida presente
Nos est crudele tentzone
Chi s'infernale legione
Nos movet continuamente,
Bos invocamos commente
Capitanu gloriosu.

12 - Libertade sos devotos
Da' peste famene et gherra,
A sos chi bivent in terra
Alcantzadelis sos votos,
Cun perfetta caridade,
Benignu et miraculosu.

Gosos de Santu Jacu su Minore Apostolu

De giustu has alcantzadu
Cognomen tantu diciosu
De Cristos meda istimadu
Santu Jacu gloriosu.

1 - Fradile a su Segnore,
Et in tottu simizante,
Vigilante imitadore
In dogni logu et istante,
De s'infantzia hazis lassadu
Dogni male coidadosu.

2 - De bistimentos de linu
Semper andestis bestidu
A bois solu su camminu
Semper istesit cuntzedidu,
In su logu pius sagradu
De haer assentu premurosu.

3 - Pro continua oratzione,
Sos benigios s'induresint,
Chi cun sobrada resone
Sos de camellu imitesint,
Pro haer semper imitadu
su Mastru misteriosu.

4 - Sa santidade emminente
Bos cherfesit Cristos dare,
Et procurat ogni zente
Sos bestires de toccare,
Cun cussu restat curadu
Ogni tullidu et lebrosu.

5 - Preigande cun fervore
A su popolu giudeu,
Nende chi su Redentore
Fiz'est de su veru Deu,
Pedra bos hant tiradu
Comente facinorosu.

6 - A s'istante bos alziesint
Subra su templu eminente,
Luego bos precipitesint
Fin'a terra crudelmente,
Et mancari tantu oltragiadu
Los perdonestis piedosu.

7 - Sende in terra mesu mortu,
Pro issos in oratzione,
Sa conca bos han isortu
Cun d'unu forte bastone,
Hazis s'anima integradu
A Cristos, frade amorosu.

8 - Favoride a sos devotos
Chi bos veneran' ogn'annu
Atzettadeli sos votos,
Gia' chi sezis tantu mannu
Disterrade su peccadu,
Dadelis esternu gosu.

Gosos de Santu Isidoro Mannu

Messaju miraculos
Pienu de divinos rajos
Pregande pro sos messajos
Isidoro santu gloriosu

1 - In Madrid hazis rajadu
Sos primos bostros albores,
Cun pius vivos resplendores
Hazis s'Ispagna illustradu,
Rajos hazis dispensadu
Pius de sole luminosu.

2 - In su fiore de sos annos
De sa ostra piccinnia,
Fatestis sa messaria
Cun ammiru de sos mannos
De sos pius teneros annos,
Binchidore valorosu.

3 - Innantis de commentzare
De sa terra sa coltura
Dogni die cun termura
Visitestis templu et altare,
A Jesus pro dimandare
Fruttos de eternu reposu.

4 - Cando fustis occupadu
In sa santa oratzione,
Pro divina dispositzione
Cuddu travagliu paradu,
Sos anghelos cun s'aradu
Suplian cun summu gosu.

5 - De un'abbundante regorta
Pro esser su mere in suspettu
Li destis su trigu nettu;
Sa paza un'attera orta
Bentulende, già arregorta
Desit fruttu pius ubertosu.

6 - Su mere tantu ansante
De sidi in sa ostra domitta,
Tocchestis cun sa palitta
Sa terra et in cuss'istante;
Bessesit abba abbundante
Contra su sidi fogosu.

7 - Custa vena manantziale
De prodigios ricca mina,
Est rimediu et meighina
A su pius teneru male,
Donat a salude finale
A s'infirmu perigulosu.

8 - Tzegos, tzoppos liberados
Presos de morbu letale
S'amparu ostru ispeciale
Invocande sun sanados
Malaidos disisperados
Bos acclamat portentosu.

9 - A su viadore meschinu
Hazis dadu accattamentu
Allogiu et sustentamentu
Instrada a su peregrinu
Hat a su Messia divinu
Fatigadu et affannosu.

10 - De su chelu tantu amigu,
De messajios protettore.
In tempus de asciuttore
Dade nos abba et trigu;
Chi su poberu mendigu
Non nde siat bisongiosu.

11 - De peccadu sentza neu
Cumplidu hazis sa gherra
Dae custa misera terra
Bolesit s'anima a Deu,
Su corpus sagru et intreu
Adorat Madrid diciosu.

12 - Pustis, cun fama notoria,
Bos hat distintu su chelu.
De custu mortale velu
Portade nos a sa gloria,
Cun palma de sa vittoria
Contra s'inferru orgogliosu.

Gosos de sa Madonna de S'Ausiliu

O suprema Imperadora
A bois altzamos sas manos
Ausiliu de sos cristianos
Siades nostra intercessora.

1 - De tempos meda lontanos
Ses semper riverida,
Ca gratzias semper in vida
Has dadu a sos cristianos,
Et cun sas benignas manos
Nde dispensas in dogn'ora.

2 - In tottu sas maladias
ses "Salus Infirmorum",
Causa de sas allegrias
In sos "Coros Angelorum",
Tottu sas personas pias
Bos tenent protettora.

3 - No bi hat in sa terra arena,
Abba non bi hat in mare
Canta gratzias dispensades,
Salude a manos pienas,
Ca de sas gratzias sas venas
Bos abbundana in dogn'ora.

4 - Tottu cuddos affligidos
De males pius ostinados,
Dae bois restan curados
Prontamente assistidos,
Tzegos, tzoppos et tullidos
Et muribundos ancora.

5 - Azudu in s'afflitzione
Cando semus in appretu,
In bois hamos s'isettu
mama de consolatzione,
Sa ostra protetzione
Est in tottu superiora.

6 - Sos massajos cando braman
De sa terra tenner' fruttu,
Tenen grande produttu
Si s'azudu ostru jaman',
Et pro cussu bos acclaman'
Suprema benefattora.

7 - Sos chi sun'impresonados
De su delittu innotzentes,
Si bos pregan riverentes
Sun'in breve liberados,
De sos isventurados
Sezis mama et difensora.

8 - Fintzas pro sos animales
Bos pregan cun premura,
Prontamente tenet cura
De maladias mortales,
Pro dolores et males
Sezis medica et dottora.

9 - Fintzas calchi lite ingiusta
Contra zente onesta et pinta,
Cun onore istesit linta
Pro bois mama augusta,
De dogni pretesa giusta,
Divina procuradora.

10 - In sos bisonzos estremos
Cando a bois recurrimos,
Sas gratzias semper tenimos
Chi non negades a nemos,
De sos tesoros supremos
Sezis sa dispensadora.

11 - Sas tempestas bois calmades
De randine abba et tempos,
Tottu sos elementos
Cun podere cumandades,
Difensora siades
De sa fida in s'ultim'ora.

12 - Contra sos res de sa terra
Chi faghen de prepotentes,
Chi contra sos innotzentes
Cheren attaccare gherra,
Bois in contierra
Sezis forte protettora.

13 - In sa tzittade 'e Torinu
Tenides tempiu eminente,
Frequentadu de sa zente
Chi b'accudit de continu,
Faghinde longu caminu
Pro bider tanta aurora.

14 - Fintzas in custu paisu
De Sedilo cun amore,
Rinnovades cun fervore
Custa cresia a s'improvvisu,
In tempus longu pretzisu
De zente benefattora.

15 - O, Signora de s'Ausiliu,
Bos pregamos tottucantos
Inter anghelos et santos,
Nos donedas domiciliu;
Terminadu custu esiliu
De sa terrena dimora.

Gosos de Santu Juanni Battista

Organu de su Segnore
Et oraculu sagradu
Santu pius esaltadu
Gian Battista precursore.

1 - Santu de grande potentzia
A custu mundu imbiadu,
In virtude et eccellentzia
Subra tottus realtzadu,
Dae Cristos pregonadu
Profeta de su Segnore.

2 - S'angelica dignidade
Chi annuntziesit su Messia
Prevenit a Zaccaria
Sa ostra natividade
In forma et calidade
De custu supremu onore.

3 - Boghe sonora in desertu
De s'ispiritu animanda,
A sa paraula increada
Sas animas hat abertu,
Hat tottu su mundu fertu
Cun sas armas de s'amore.

4 - Astru chi prim'hat rajadu
Cale istella mattutina,
De s'altra gloria divina
Brillante carru doradu,
Et de Verbu incarnadu
Divin'aposentadore.

5 - Ti ses in gratzia elevadu
Cun siblime emulatzione,
Et s'usu de sa resone
A s'edade anticipadu,
Sentza nascher adoradu
Has su divinu Redentore.

6 - Naschet minore in su mundu
Su chi fit grand'in su chelu,
Intrat s'inferru in rezelu
Tenet tottu su profundu,
De cust'abore giocundu
Intendide su gratu odore.

7 - Pro ministru t'elegesit
Cudd'infante soberanu,
Cando in su Giordanu
Su battisimu retzesit,
Ch'isse solu meritesit
Cust'eccellente favore.

8 - Profeta et pius che profeta
Su Segnore bos acclamat,
Et i su mundu bos giamat
Pro superiore planeta,
Favorabile cometa
De divinu resplendore.

9 - Sas gratzias celestiales
In tantu bos adornesint,
Chi ammirados s'agattesint
Sos coros angelicales,
Chi in tottu sos mortales
Non nd'hat naschidu mazore.

10 - Custu santu naschimentu
S'anghelu l'annuntziesit
A su babbu in su templu
Et pro chi difficultesit,
In tottu mudu restesit
Cun grandissim'istupore.

11 - A tie Re soberanu
Benit pro lu battizare,
In su fiumene Giordanu
Ma procurat de s'iscusare
Et umilmente cunfessare
"So indignu peccadore".

12 - Est fortzadu finalmente
Dae Cristo alta clementzia,
Lu battizat umilmente
Cun timore et riverentzia,
A ipse cun preminentzia
Lu battizat su Segnore.

13 - Chie det poder contare
Cudd'aspera penitentzia,
De bestire et mandigare
Frittu calore et astinentzia,
Pro chi s'alta clementzia
Li faghesit su favore.

14 - Deo in abba solamente
Bos battizo fin'a tantu,
Chi benzat s'Altu Potente
Cal'est s'Ispiritu Santu,
Et bos diat gratzias tantu
Cantu podet s'Altu Segnore.

15 - Ermos infante naschidu
De Maria regaladu,
Chi a su Segnore increadu
Caminos has prevenidu,
De ogni omine affligidu
Cherzas esser protettore.

GOSOS DE SANTU COSTANTINU MANNU IMPERADORE

Gosos de Santu Asili Mannu Dottore

Claru sole de Oriente
De sa Cresia risplendore!
Favoride custa gente,
Basili Magnu Dottore.

1 - In Cappadoccia naschidu,
Fertile et bellu terrenu;
Cun Gregori Nazianzenu
Giustamente illustre nidu.
Ambos inie hant fioridu
In dottrinas de valore.

2 - Sende in gioventude appenas,
In sos istudios maggiores,
Istetistis in Attenas
Pro esemplare a sos dottores:
Impugnande sos errores
De s'erege ingannadore.

3 - Cun carittativu prontu
Cherinde a tottu salvare,
Andestis a predicare
S'Evangeliu a sos de Pontu,
Hue ereges sentza contu
Convintos lassan s'errore.

4 - Su Altu Segnore Increadu
A sa patria bos torresit,
Pro chi bos predestinesit
De Cesarea preladu:
Pastore tantu esaltadu
In caridade et fervore.

5 - Pro portare a salvatzione
Su mundu che Noè in S'Arca,
Bos fettisit Patriarca
De sa Santa Religione
Su Divinu Re de Sionne
De chelu et terra Segnore.

6 - Tottus sos Anacoritas
Chi bivian in cuss'edade
Los fettistis trasmutare
In perfettos Cenobistas,
Fuide in sos Eremitas
De sos desertos s'orrore.

7 - Tenzistis tanta potentzia
In sos chelos et valore
Alcantzada cun s'amore
De sa santa Penitentzia,
Chi bos desit obbedientzia
S'infernale tentadore.

8 - Elias sezis in su chelu,
Moisès in sos portentos;
A bois sos elementos
Obbedint in terra et in chelu;
Sos demonios cun rezelu
Bos miran cun terrore.

9 - S'Imperadore Valente,
Mostru orrendu de s'inferru,
Sententziesit a disterru
Custu Sole risplendente:
Su Segnore Onnipotente
Du difendet cun valore.

10 - Cando istesit pro firmare
Sa sententzia iniquamente,
Benit ispantosamente
Sa manu a si siccare,
Sa cadire a si segare
Cun orribile istupore.

11 - Sprigu fistis de astinentzia,
Portentu de caridade;
Fistis norma in castidade,
Prodigiu in sa penitentzia;
Suggettande a s'obbedientzia
Su corpus cun su rigore.

12 - Sezis augustu ritrattu
De sos antigos Profetas;
De sas Virgines perfettas
Lughente immagine fattu;
Lizu virginale ritrattu
De vivissimu candore.

13 - In su fine coronadu
De singulares vittorias
Galas, virtude et glorias
Sos chelos bos hant cantadu,
Inue Deus bos hat dadu
Tronu de sublime onore.